van gaal 1

上季紅魔鬼在莫耶斯的帶領下慘不忍睹,成班曼聯Fans好似抬唔起頭做人咁,唔係話佢地輸唔起,但因為戰術或用人而輸就好唔抵。如今由真真正正有多年班霸級球隊經驗既雲高爾帶領,雖然聯賽未開鑼,但個心都會安樂好多。

荷蘭領隊有個特點,呢個特點在雲高爾及希丁克身上顯露無遺,就係相當注重兩翼側擊。特別記得02世界盃睇完南韓之後翌年再睇PSV,真係八襾金同八襾仔咁,倒模一樣,所以來季曼聯會踢成點,不妨參考一下荷蘭於剛剛踢完世界盃既荷蘭。

van gaal 2

一隊波既陣容有三種擺法,第1就係依照領隊意思,第2就係圍繞某些球員為重心而作出相對應既變動,第3就係睇餸食飯,乜球員適合乜位置就擺佢落去。

對於第1種,就好似去韓國整容咁,唔鍾意既,眼耳口鼻全部大執,但只適用於富豪球會;第2種,善用球隊沿有資產,亦即球員,表表者有李華度同派路,因應球員特質而就陣容上作出相對應既調動,呢種方法都要球隊有資產先做得出;第3就最常見,限米煮限飯,亦最常見,邊間球會唔想紐亞守龍美斯尼瑪雙箭頭?有錢先得架!

van gaal 3

曼聯好明顯屬於第1種,幾乎係雲高爾想點就點,所以亦有傳話佢將會以3-4-3或5-3-2陣式為主打,如此一來朗尼位置就非常尷尬,因為雲佩斯會係箭頭,咁朗尼肯唔肯又或適唔適合匿喺雲佩斯後面?一旦唔願意或唔適合,雲高爾真係可能賣走佢換個卡雲尼返黎。

以球迷角度出發絕對係好事,唔係唔鍾意朗尼,相反我覺得佢真係近年英格蘭難得既前鋒,由愛華頓出道睇到而家,絕對係英格蘭既貴寶,但如因陣式問題而將佢賣走亦無可厚非,到時就會睇到多支風格截然不同既球隊於綠茵球場上對決。相比起朗尼,其實我更加關心係曼聯會搵邊兩位球員打翼,蘭尼?賣走佢啦,冇品到爆。

最後送上一段爆趣短片,憎莫耶斯既一定會睇到笑騎騎。

http://www.youtube.com/watch?v=-71sE2JjvqQ