lahm

自己都係德國躉,驚都未驚過。

06世界盃顯露頭角,被視為是卡路士和馬甸尼之後最受觸目的左閘,但實話說說,拿姆跟兩位殿堂級球員相比好像仍有一段距離。

右腳仔踢左中場不罕見,右腳仔打左閘就確實比較稀有,幸而拿姆都算係雙槍將,影響未算太大。

重點係一位球員於球隊所發揮的功能,自從卡富卡路士年代之後Wing-back一詞冒起,overlap破越位專用,前題是做得Wing-back就要沉底傳中,往往K角位出波即係阿茂整餅盞搞。論速度,拿姆真的能壓過對方邊衛?論扭波,有幾何見到拿姆扭過對方守衛沉底傳中?

唔係想踩低佢,拿姆既足球態度、以及對拜仁及國家隊的貢獻有目共睹,但論世界頂級又似乎未到,就算佢被國際足協評定2014世界盃最佳11人都係咁講。大家須知最佳11人裡面往往有五至六個來自冠軍球隊,然而今屆德國贏就贏在整體,以個人而言,拿姆唔係唔好,只係未算最頂級。咁亦解釋到點解曉姆斯都能夠入選最佳11人。

以現今足球來說,30歲退出國家隊正常不過,能在退出國家隊之前高舉大力神盃可算是足球員的最高榮譽。重申,唔係想踩佢,佢能夠以隊長身份捧起世界盃絕對值得恭喜,反而如果有後起之秀能夠頂上,對德國反而更好。